Եվրահանձնաժողովը գնահատել է Հայաստանի հետ վիզաների ազատականացման հեռանկարները

Եվրոպական միությունը հաստատում է Հայաստանի հետ հարաբերությունները խորացնելու և վիզային ռեժիմի ազատականացման շուրջ ակտիվ երկխոսությունը շարունակելու իր հանձնառությունը:

Անդրադառնալով այն կանխատեսումներին, թե արդյոք ՀՀ քաղաքացիները կկարողանան մինչև 2029 թվականն առանց մուտքի արտոնագրի ճամփորդել Եվրամիության երկրներ՝ Եվրահանձնաժողովի պաշտոնական ներկայացուցիչ Պաուլա Պինյոն զերծ է մնացել հստակ ժամկետներ նշելուց։

Ըստ եվրոպացի պաշտոնյայի՝ այս պահին դեռ վաղ է խոսել կոնկրետ մանրամասների և ազատականացման ստույգ ամսաթվի մասին, քանի որ գործընթացը գտնվում է աշխատանքային փուլում:

«Ակնհայտ է, որ մենք ներգրավված ենք գործընթացում և Հայաստանի հետ քննարկում ենք մի շարք հարցեր այն մասին, թե ինչպես կարող ենք ավելի սերտ համագործակցություն հաստատել»,- ընդգծել է Պինյոն։

Նա հավելել է, որ Բրյուսելն ու Երևանը ներկայումս բանակցություններ են վարում մի շարք ուղղություններով, և հենց որ այդ քննարկումները հասունանան, կողմերը կանցնեն ավելի սերտ գործընկերության հաջորդ տրամաբանական փուլին: