Հուլիսի 20-ին ՀՀ կառավարությունը հավանություն է տվել գործադիր իշխանության կառուցվածքային խոշոր բարեփոխմանը՝ առաջարկելով նոր անվանումներ և ընդլայնված գործառույթներ երեք գերատեսչությունների համար։
Հունիսյան խորհրդարանական ընտրություններից հետո վարչապետ Նիկոլ Փաշինյանի կողմից ներկայացված այս նախաձեռնությունը, ըստ նրա, նպատակ ունի պետական ապարատը հարմարեցնել ժամանակակից տնտեսական, տեխնոլոգիական և սոցիալական իրողություններին։
Կառավարության նիստում հաստատված և առաջիկայում Ազգային ժողովի քննարկմանը ներկայացվելիք նախագծով նախատեսվում է արմատապես փոխել դիվանագիտական, տեխնոլոգիական և սոցիալական ոլորտների պետական քաղաքականության շեշտադրումները։
Արտաքին գործերի նախարարությունը կվերանվանվի Արտաքին գործերի և միջազգային առևտրի նախարարություն։ Փաշինյանն ընդգծել է, որ նախկինում հանրապետության արտաքին գերատեսչության գործունեության գերակշիռ մասը կենտրոնացած է եղել հակամարտությունների օրակարգի վրա, մինչդեռ այժմ առաջնահերթությունը պետք է տրվի տնտեսությանը։ «Տնտեսական գործունեությունը, միջազգային տնտեսական կապերը պետք է լինեն մեր դեսպանատների և մեր դիվանագիտական ծառայության ամենօրյա աշխատանքային օրակարգում։ Կարծում եմ՝ սա կարևոր հայեցակարգային փոփոխություն է», - հայտարարել է վարչապետը։
Մեկ այլ ուշագրավ նորարարություն է Բարձր տեխնոլոգիական արդյունաբերության նախարարության վերանվանումը՝ Բարձր տեխնոլոգիական արդյունաբերության և արհեստական բանականության նախարարության։ Գերատեսչության կազմում կստեղծվի արհեստական բանականության (ԱԲ) հատուկ գրասենյակ։ Կառավարության ղեկավարը փաստել է, որ երկրում արդեն իսկ գործում է երեք սուպերհամակարգչային կենտրոն, որոնցից երկուսը ծառայում են որպես ԱԲ գործարաններ։ «Լավ լուրն այն է, որ արհեստական բանականության ենթակառուցվածքն այլևս մեզ համար նորությունների թողարկման մեջ գտնվող նյութ չէ», - նշել է նա՝ հավելելով, որ ոլորտի արագ աճը կպահանջի վերանայել էլեկտրաէներգիայի սպառման և արտադրության ռազմավարությունը։
Միաժամանակ նա զգուշացրել է մարդկային գործոնի պահպանման կարևորության մասին. «Մենք պետք է ջանք գործադրենք, որ արհեստական բանականությունը մարդուն կյանքից դուրս չթողնի, և սա լրջագույն մարտահրավեր է»։
Երրորդ փոփոխությունը վերաբերում է Աշխատանքի և սոցիալական հարցերի նախարարությանը, որը կկոչվի Աշխատանքի և բարեկեցության նախարարություն։ Նպատակն է արմատապես փոխել աշխատանքի հանրային ընկալումը՝ այն չարչարանքից վերածելով բարեկեցության հասնելու հիմնական գործիքի։
Պետությունը նախատեսում է մեծացնել քաղաքացիների մրցունակությունն աշխատաշուկայում, որպեսզի նորագույն տեխնոլոգիաները ոչ թե փոխարինեն, այլ օգնեն մարդկանց ավելի արդյունավետ գործել։ «Հայաստանում բարեկեցության հասնելու մոդելը պետք է լինի կրթությունը, աշխատանքը, մասնագիտական կարողությունների զարգացումը, առողջ ապրելակերպն ու աշխատանքային վաստակը», - եզրափակել է վարչապետը։
