Արցախից տեղահանվածների վարձավճարի հատուցում՝ 40 հազար դրամ 10 տարի շարունակ

Հայաստանի կառավարությունը շարունակում է Լեռնային Ղարաբաղից տեղահանված խոցելի խմբերի համար բնակարանների վարձակալության մասնակի փոխհատուցման ծրագիրը:

Առաջիկա տասը տարիների ընթացքում շահառու ընտանիքների յուրաքանչյուր անդամ ամսական կստանա 40 հազար դրամ ֆինանսական աջակցություն՝ պետական բնակապահովման հիմնական ծրագրից հրաժարվելու դեպքում:

ՀՀ աշխատանքի և սոցիալական հարցերի նախարարության տվյալներով՝ այս նախաձեռնությունից կարող են օգտվել մինչև երեք անձից բաղկացած այն ընտանիքները, որոնք չեղարկել են բնակարանային գնման հավաստագիրը և պաշտոնապես հաշվառվել են պետական սոցիալական բնակֆոնդի հերթացուցակում:

Ծրագիրը հատկապես թիրախավորում է հատուկ կարիքներ ունեցող անձանց. այն հասանելի է առաջին կամ երկրորդ խմբի անժամկետ հաշմանդամություն, ֆունկցիոնալության ծանր սահմանափակում ունեցողներին, ինչպես նաև տարեցներին:

Տարիքային ցենզի հատուկ պահանջով՝ 60 և ավելի տարեկան երկու անդամի դեպքում նրանց տարիքների ընդհանուր գումարը պետք է գերազանցի 115-ը, իսկ երեք անդամի դեպքում՝ 175-ը:

Դիմումների ընդունման գործընթացը կազմակերպվում է բացառապես առցանց հարթակում, սակայն նախքան էլեկտրոնային հայտ լրացնելը՝ քաղաքացիները պարտավոր են ֆիզիկապես մոտենալ Միասնական սոցիալական ծառայության կենտրոններ՝ սոցիալական հերթացուցակում գրանցվելու նպատակով: