ՀՀ և Հնդկաստանի ԶՈՒ գլխավոր շտաբները նոր ձևաչափով կհամագործակցեն

Հայաստանի և Հնդկաստանի միջև պաշտպանական ոլորտում փոխգործակցությունը նոր մակարդակի է բարձրանում. երկու երկրների զինված ուժերի գլխավոր շտաբները հաստատել են համագործակցության նոր և ընդլայնված ձևաչափ:

ՀՀ պաշտպանության նախարարության տրամադրած տեղեկատվության համաձայն՝ պաշտպանական գերատեսչության ղեկավարի առաջին տեղակալ, Զինված ուժերի գլխավոր շտաբի պետ, գեներալ-լեյտենանտ Էդվարդ Ասրյանն օգոստոսի 17-ին ընդունել է պաշտոնական այցով Երևան ժամանած Հնդկաստանի պաշտպանության քարտուղար Ռաջեշ Կումար Սինգհին։

Բարձրաստիճան հանդիպման և բանակցությունների ընթացքում կողմերը հանգամանալից անդրադարձել են հայ-հնդկական ռազմական գործակցության ընթացիկ հարցերին ու ռազմավարական զարգացման հեռանկարներին:

Հանդիպման առանցքային արդյունքներից է դարձել նախկինում ձեռք բերված բարձր մակարդակի պայմանավորվածությունների գործնական իրագործումը. պաշտոնյաները փոխանակվել են համապատասխան փաստաթղթով, որն իրավական և պլանային հստակ հիմք է ստեղծում երկու պետությունների գլխավոր շտաբների միջև փոխշահավետ ռազմական գործակցության նոր մոդելի համար: