Փաշինյանը վախի ազդեցության տակ կհանձնի ամեն ինչ՝ գյուղերից մինչև Երևան

Իր վերընտրվելու դեպքում գործող վարչապետ Նիկոլ Փաշինյանը կհանձնի ոչ միայն այն տարածքները, որոնց մասին արդեն հայտարարել է, այլև շատ ավելին։ Այս մասին հայտարարել է «Ուժեղ Հայաստան» կուսակցության առաջնորդ, գործարար և բարերար Սամվել Կարապետյանը։

Նա նշել է, որ այսօր Փաշինյանն օգտագործում է այսպես կոչված «անսկլավների» ադրբեջանական անվանումները, իսկ վաղը կօգտագործի ադրբեջանական տեղանունները՝ խոսելով նաև Երևանի, Սյունիքի կամ Սևանի մասին։

Կարապետյանի կարծիքով՝ այս մարդն ամեն ինչ անում է զուգահեռաբար, և նրա վերընտրվելու դեպքում պետք է սպասել ոչ միայն տարածքային զիջումների, այլև ադրբեջանցիների զանգվածային վերաբնակեցման Հայաստանում, ընդ որում՝ այդ գործընթացը կարող է չսահմանափակվել 300 հազարով։ Խոսքը կարող է վերաբերել 500 հազարի կամ նույնիսկ մեկ միլիոնի, վստահ է Կարապետյանը։

«Հենց այդ գործընթացը սկսվի, ո՞վ է այն կանգնեցնելու»,- հայտարարել է նա՝ հավելելով, որ տեղի ունեցածը համարում է նախապես ծրագրված։ Կարապետյանն ակնարկել է, որ «շեֆը» դրանից մեկ շաբաթ առաջ իր տեղակալին ուղարկել է Հայաստան, որից հետո, նրա խոսքով, բաժանվել են բոլոր հրահանգները և սկսվել են «սցենարի» իրականացման նախապատրաստական աշխատանքները։

Պատասխանելով իշխող ուժի ներկայացուցիչների՝ լրտեսության վերաբերյալ մեղադրանքներին՝ Կարապետյանը նշել է. «Եթե ես լրտես եմ, ապա հայ ժողովրդի լրտեսն եմ»։ Նրա խոսքով՝ վարչապետը գրգռված է նրանից, որ ընդդիմությունն ամեն շաբաթ բացահայտում է իշխանությունների ապօրինի քայլերը և հանրությանը ցույց տալիս կառավարության թույլ կողմերը։

Կարապետյանը նաև ընդգծել է, որ երկրում կատարվողը հասկանալու համար պետք չէ հետախույզ լինել։ Նրա խոսքով՝ ցանկացած մարդ, ծախսելով ընդամենը մեկ ժամ, ունակ է տեսնել ինչպես Փաշինյանի «ապօրինի գործողությունները», այնպես էլ արտաքին ու ներքին քաղաքական այն խնդիրները, որոնց, քաղաքական գործչի կարծիքով, վարչապետը հասցրել է երկիրը ութ տարվա ընթացքում։

Կարապետյանը կոչ է արել Փաշինյանին ինքնուրույն կողմնորոշվել, թե «քանի երկրի լրտես է», հավելելով, որ, իր կարծիքով, խոսքը վերաբերում է «առնվազն Հայաստանի հանդեպ երկու ոչ բարեկամական պետությունների»։