Տասնամյակների դադարից հետո Հայաստանն ու Պակիստանը դեսպաններ կնշանակեն

Տասնամյակներ շարունակված դիվանագիտական վակուումից հետո Հայաստանն ու Պակիստանն անցնում են երկկողմ կապերի կառուցման գործնական փուլին: Երևանն ու Իսլամաբադը մեկնարկել են ոչ ռեզիդենտ դեսպանների հավատարմագրման գործընթացը՝ վերջնականապես փակելով պատմական տարաձայնությունների էջը։

Այս նշանակալի քայլի մասին մարտի 23-ին Ազգային ժողովի արտաքին հարաբերությունների մշտական հանձնաժողովի նիստի ժամանակ հայտարարեց ՀՀ արտաքին գործերի նախարար Արարատ Միրզոյանը։ Արտաքին քաղաքական գերատեսչության ղեկավարի խոսքով՝ Իսլամաբադի հետ շփումների բացակայությունը երկար տարիներ մնում էր բարդ աշխարհաքաղաքական հանգույց՝ ուղղակիորեն փոխկապակցված հայ-ադրբեջանական և հայ-թուրքական հարաբերությունների հետ։ Սակայն նախորդ տարի կողմերին հաջողվեց հասնել պատմական փոխըմբռնման։

Միրզոյանն ընդգծեց, որ պակիստանյան կողմը հարաբերությունների հաստատման փաստին բավականին մեծ հանդիսավորություն հաղորդեց: Ներկայումս պետությունները գտնվում են ակտիվ կապի մեջ և նախապատրաստվում են դիվանագիտական ներկայացուցիչների հավատարմագրմանը, որոնք այս փուլում կլինեն ոչ ռեզիդենտ։ Նախարարը նաև հավելեց, որ Պակիստանից բացի, անցած տարի Երևանը պաշտոնական դիվանագիտական հարաբերություններ է հաստատել Լեսոտոյի և Սողոմոնյան կղզիների հետ:

Հիշեցնենք, որ Հայաստանն ու Պակիստանը պաշտոնապես դիվանագիտական հարաբերություններ են հաստատել 2025 թվականի օգոստոսի 31-ին։ Համատեղ կոմյունիկեի ստորագրման արարողությունը կայացել է Չինաստանի Տյանցզին քաղաքում՝ Շանհայի համագործակցության կազմակերպության (ՇՀԿ) գագաթնաժողովի շրջանակներում։ Այս պատմական իրադարձությունն ազդարարեց այն երկարամյա ժամանակաշրջանի ավարտը, երբ Պակիստանն աշխարհի միակ պետությունն էր, որը չէր ճանաչում Հայաստանի Հանրապետության անկախությունը: