Փաշինյանը «մոլդովական սցենարով» կարող է ընտրությունից հանել Կարապետյանի ուժին. պատգամավոր

Վարչապետ Նիկոլ Փաշինյանի նախկին թիմակից, այժմ «Միացյալ ազգային սահմանադրական» կուսակցության ղեկավար և ԱԺ պատգամավոր Հովիկ Աղազարյանը կանխատեսում է «մոլդովական սցենարի» կիրառում՝ իշխանությունների կողմից որպես գլխավոր մրցակից դիտարկվող «Մեր ձևով» շարժմանը նախընտրական մրցավազքից հեռացնելու համար:

Մարտի 9-ին լրագրողների հետ հանդիպման ժամանակ խորհրդարանականը «Մեր ձևով» շարժումը բնութագրել է որպես այսօրվա դրությամբ ընդդիմադիր դաշտի առաջատար և գործող իշխանությանը լուրջ այլընտրանք: Անդրադառնալով ներքաղաքական զարգացումներին՝ քաղաքական գործիչը ներկայացրել է իրադարձությունների ծավալման երկու հիմնական սցենար։ Առաջինը, որն ինքը՝ Աղազարյանը, համարում է քիչ հավանական, սակայն ոչ անհնարին, ենթադրում է իշխանության խաղաղ փոխանցում. ըստ այդմ՝ Նիկոլ Փաշինյանն ընտրությունների արդյունքում զիջում է առաջնորդությունը այս շարժմանը և հեռանում քաղաքականությունից՝ որպես պատմական գործիչ:

Երկրորդ և առավել հավանական տարբերակը, ըստ պատգամավորի, ենթադրում է վարչական ռեսուրսի կոշտ կիրառում: Աղազարյանը կանխատեսում է, որ տեսնելով ընդդիմադիր զանգվածի կոնսոլիդացիան՝ վարչապետը կարող է կանխարգելիչ քայլերի դիմել և պարզապես թույլ չտալ ուժին մասնակցել հունիսի 7-ին նախատեսված ընտրություններին։ Նրա հաշվարկներով՝ շարժման գրանցումը կարող է մերժվել կամ այն կարող է հանվել ընտրապայքարից մայիսի 15-20-ն ընկած ժամանակահատվածում, ինչը պատգամավորը որակել է որպես «մոլդովական սցենար»։

Պատասխանելով լրագրողների այն հարցին, թե արդյոք կան նման ծայրահեղ որոշման համար բավարար իրավական հիմքեր, Աղազարյանը հանդես է եկել բավականին իռոնիկ հայտարարությամբ։ Նա նշել է, որ եթե կառավարության ղեկավարը դժվարանա գտնել անհրաժեշտ հիմքերը, ապա ինքն անձամբ կտրամադրի դրանք վարչապետին՝ հավելելով, որ հակառակ դեպքում Հայաստանի քաղաքական դաշտը պարզապես կորբանա։