Վերջին հինգ տարում ձեռք է բերվել13 մլրդ դրամի գիտական սարգավորում. Նիկոլ Փաշինյան

ՀՀ վարչապետ Նիկոլ Փաշինյանը կառավարության նիստի ժամանակ ամփոփել է գիտության ոլորտի բարեփոխումների արդյունքները՝ փաստելով, որ 2025 թվականին պետական հատկացումները հասել են 40,2 միլիարդ դրամի։ Սա շուրջ երեք անգամ գերազանցում է 2018 թվականի ցուցանիշը և թույլ է տվել իրականացնել գիտաշխատողների վարձատրության համակարգի արմատական վերանայում ու տեխնիկական վերազինում։

2021-2026 թվականների համար սահմանված նոր սանդղակով գիտական աշխատողների եկամուտներն արձանագրել են աննախադեպ թռիչքաձև աճ՝ ոլորտը դարձնելով առավել գրավիչ։ Կրտսեր գիտաշխատողների վարձատրությունն աճել է 205%-ով՝ հասնելով 276 հազար դրամի, իսկ գլխավոր գիտաշխատողների պարագայում աճը կազմել է շուրջ 300%՝ ապահովելով ավելի քան կես միլիոն դրամի նվազագույն շեմ։ Վարչապետն առանձնահատուկ նշել է, որ սրանք բազային երաշխավորված ցուցանիշներ են, որոնք էլ ավելի են մեծանում գիտական տարբեր ծրագրերում և դրամաշնորհներում ներգրավվածության շնորհիվ, ինչն այսօր դարձել է համատարած պրակտիկա։

Ֆինանսական աջակցությանը զուգահեռ պետությունը հսկայական ներդրումներ է կատարել նաև ենթակառուցվածքների թարմացման մեջ, քանի որ գիտության արդյունավետությունն անհնար է առանց ժամանակակից լաբորատոր հագեցվածության։ Վերջին հինգ տարում ձեռք է բերվել 142 ժամանակակից գիտական սարքավորում՝ ընդհանուր 13 միլիարդ դրամ արժողությամբ։ Այս գործընթացի առանցքային ձեռքբերումներից է Երևանի պետական համալսարանի նոր սուպերհամակարգիչը, որի տեղադրման համար հատկացված 3,7 միլիարդ դրամը նոր հորիզոններ է բացում բարդ հաշվարկների և բարձր տեխնոլոգիական հետազոտությունների համար։