Ապօրինի գույքի վերադարձի գործընթացն այլևս անշրջելի է և ինստիտուցիոնալ. Փաշինյան

Հայաստանում ապօրինի գույքի բռնագանձման մեխանիզմները, համաձայն իշխանության, վերջնականապես կայացել են և գործում են ինստիտուցիոնալ մակարդակում։

Դեկտեմբերի 4-ի կառավարության նիստում վարչապետ Նիկոլ Փաշինյանը հայտարարեց, որ գործընթացը դարձել է անշրջելի՝ այլևս չպահանջելով քաղաքական ղեկավարության ամենօրյա միջամտությունը։

Վարչապետը հիշեցրեց հետհեղափոխական շրջանի հանրային պահանջը՝ կապված թալանվածի վերադարձի հետ, պարզաբանելով, որ ապօրինի գույքը մեկ տեղում կենտրոնացած չէր, այլ բազմաշերտ էր և ցրված, ինչը պահանջում էր երկարատև ուսումնասիրություն։ Ըստ Փաշինյանի՝ այսօր արդեն իրավական համակարգը լիարժեք գործարկված է, և պատկան մարմինները աշխատում են ինքնուրույն ռեժիմով՝ ապահովելով շարունակական արդյունքներ։

Գլխավոր դատախազ Աննա Վարդապետյանն իր հերթին կարևորեց համակարգի թվայնացման անհրաժեշտությունը՝ գրագրությունը նվազագույնի հասցնելու և գործընթացն ավտոմատացնելու համար։ Նա հատուկ ընդգծեց քաղաքացիների աջակցությունը, ովքեր ակտիվորեն ահազանգում են հատկապես մանկապարտեզների և հանրային տարածքների ապօրինի զավթումների մասին։ Դատախազության ուշադրության կենտրոնում այժմ անտառային գոտիներն են, Սևանի ավազանը, պուրակները և կրթական հաստատությունների տարածքները։

Որպես հաջողված օրինակներ նշվեցին Դիլիջանում երկու մանկապարտեզի և Խաշթառակում մեկ հատվածի վերադարձը, ինչպես նաև Տավուշում խոշոր առողջարանի մասով ընթացող ուսումնասիրությունները։ Նիկոլ Փաշինյանը եզրափակեց՝ նշելով, որ հերթի մեջ են տասնյակ մանկապարտեզներ և Սևանի ափամերձ հարյուրավոր հողակտորներ, որոնցից յուրաքանչյուրի հետևից պետությունը գնալու է «հատիկ առ հատիկ» սկզբունքով։

Ընթացիկ տարվա 11 ամիսների արդյունքներով ապօրինի գույքի բռնագանձման մեխանիզմներով Հայաստանի Հանրապետությանը վերադարձվել է 174 միլիոն 545 հազար դոլարին համարժեք գույք։