Դարաշրջանի ավարտ. ԵԱՀԿ Մինսկի գործընթացը պաշտոնապես փակվեց

ԵԱՀԿ-ն վերջնականապես էջը փակեց. Մինսկի գործընթացը և դրան առնչվող բոլոր կառույցները պաշտոնապես դադարեցրել են իրենց գոյությունը՝ իրավական ավարտին հասցնելով տասնամյակներ տևած միջնորդական առաքելությունը։

Կազմակերպության տարածած հաղորդագրության համաձայն՝ լուծարման գործընթացն ամբողջությամբ ավարտին է հասցվել 2025 թվականի նոյեմբերի 30-ին՝ ժամը 23:59-ին։

Այս քայլով կյանքի է կոչվել ԵԱՀԿ Նախարարների խորհրդի՝ սեպտեմբերի 1-ին ընդունած որոշումը, որը հիմնված էր Հայաստանի և Ադրբեջանի կողմից ԵԱՀԿ ֆիննական նախագահությանը հղված համատեղ դիմումի վրա։

Բոլոր անհրաժեշտ վարչարարական ընթացակարգերի ավարտը փաստում է, որ կողմերն այլևս անհրաժեշտություն չեն տեսնում հին ձևաչափի պահպանման մեջ։

Մինսկի գործընթացի փակումը վավերացվել է ԵԱՀԿ մասնակից բոլոր 57 պետությունների կոնսենսուսով։ Այս պատմական որոշման քաղաքական հիմքը դրվել էր 2025 թվականի օգոստոսի 8-ին Վաշինգտոնում, երբ ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը ստորագրեցին պատմական Համատեղ հռչակագիրը։

Հիշեցնենք, որ այդ արարողությանը որպես վկա ներկա էր գտնվել ԱՄՆ նախագահ Դոնալդ Թրամփը՝ փաստացի ազդարարելով տարածաշրջանային նոր իրողությունների սկիզբը։