ՀԷՑ-ի լիցենզիան դադարեցվեց. երեք ամիսում պետք է որոշվի գույքի փոխանցման հարցը

Հանրային ծառայությունները կարգավորող հանձնաժողովը (ՀԾԿՀ) պաշտոնապես դադարեցրեց «Հայաստանի էլեկտրական ցանցերի» լիցենզիան։ Այս որոշումը, սակայն, չի ավարտում գործընթացը, այլ այն տեղափոխում է նոր փուլ․ առաջիկա երեք ամիսներին պետությունը բանակցություններ կվարի ընկերության սեփականատեր Սամվել Կարապետյանի հետ՝ գույքի փոխանցման շուրջ։ Եթե կողմերը համաձայնության չգան, իշխանությունները կկիրառեն «գերակա հանրային շահի» իրավունքով գույքն օտարելու կարգը։

ՀԾԿՀ նախագահ Մեսրոպ Մեսրոպյանը նոյեմբերի 17-ին կայացած ասուլիսում հաստատեց, որ այսօրվա որոշմամբ գործընթացը չի ավարտվում, այլ մտնում է օրենքով նախատեսված հաջորդ փուլ։ «Եթե այդ երեք ամսվա ընթացքում կողմերը չգան համաձայնության, դրանից հետո պետությունը կարող է գերակա շահի իրավունքով վերցնել սեփականության իրավունքը», — պարզաբանեց Մեսրոպյանը։ Նա նաև ենթադրեց, որ պրոցեսն ունի շարունակություն, և կողմերն իրենց իրավունքները, հավանաբար, կփորձեն պաշտպանել այլ ատյաններում։

ՀԾԿՀ-ի այս որոշումը դարձավ այն գործընթացի ձևական ամփոփումը, որը կառավարությունը նախաձեռնել էր դեռևս հուլիսի 18-ին՝ հիմնվելով հուլիսի 15-ի հաղորդման վրա։ Այս գործընթացը հաջորդեց իշխանությունների և ՀԷՑ-ի սեփականատեր Սամվել Կարապետյանի հարաբերությունների կտրուկ լարմանը։ Հակամարտությունը սկսվեց հունիսին, երբ գործարարը քննադատեց իշխանություններին՝ Հայ Առաքելական եկեղեցու դեմ արշավի համար։

Դրանից անմիջապես հետո՝ հունիսի 18-ին, դատարանը կալանավորեց Կարապետյանին, և նույն օրը վարչապետ Նիկոլ Փաշինյանը հայտարարեց ՀԷՑ-ն ազգայնացնելու մասին։ Արդեն հուլիսի 3-ին Ազգային ժողովն ընդունել էր համապատասխան օրենքը՝ նախապատրաստելով կարգավորողի գործողությունների իրավական հիմքը։