«Պատրաստ ենք մաքսային վերահսկողության սցենարների՝ Ադրբեջանի հետ սահմանը բացվելու դեպքում»

ՊԵԿ նախագահ Էդուարդ Հակոբյանի խոսքով՝ Հայաստանը տեխնիկապես պատրաստ է իրականացնել մաքսային վերահսկողություն՝ ապաշրջափակման ցանկացած տարբերակի պարագայում։

Ադրբեջանի հետ սահմանների հնարավոր բացման և տրանսպորտային հաղորդակցության ապաշրջափակման դեպքում Հայաստանը պատրաստ է իր լիազորությունների շրջանակում սահմանել մաքսային հսկողություն։ Այս մասին Ազգային ժողովում լրագրողների հետ զրույցում հայտարարել է Պետեկամուտների կոմիտեի նախագահ Էդուարդ Հակոբյանը։

Լրագրողների հարցին՝ արդյոք Հայաստանը բանակցություններում առաջարկել է որևէ կոնկրետ մեխանիզմ՝ Ադրբեջանի հիմնական տարածքից դեպի Նախիջևան բեռների երկաթուղային փոխադրումների համար, Հակոբյանը պատասխանել է, որ ՊԵԿ-ի գործառույթը որևէ սցենարի պարագայում մաքսային հսկողության ապահովումն է։

«Երբ խոսում ենք ապաշրջափակման կամ սահմանների բացման մասին, պարզապես պետք է պատրաստ լինել բոլոր հնարավոր սցենարներին։ Մենք տեխնիկապես պատրաստ ենք, ունենք անհրաժեշտ սարքավորումներ, անձնակազմ և անցակետային փորձ՝ օրինակ՝ Մարգարայի դեպքը։ Կարող ենք ադապտացվել և ապահովել պատշաճ վերահսկողություն ցանկացած պայմաններում»,– նշել է Հակոբյանը։

Վարչապետ Նիկոլ Փաշինյանը մի քանի անգամ հայտարարել է, որ հայկական կողմը Ադրբեջանին առաջարկել է ապաշրջափակումը սկսել երկաթուղային բեռնափոխադրումներից՝ Զանգելան–Մեղրի–Օրդուբադ և Երասխ–Օրդուբադ–Մեղրի ուղղություններով։

Ապաշրջափակման շուրջ քննարկումները սկսվել են 2021 թվականի հունվարի 11-ից հետո՝ Հայաստանի, Ռուսաստանի և Ադրբեջանի ղեկավարների երկրորդ եռակողմ հայտարարության հիման վրա։ Այդ հայտարարությամբ ստեղծվել է փոխվարչապետերի մակարդակով աշխատանքային խումբ, որտեղ Հայաստանը ներկայացնում է Մհեր Գրիգորյանը։

Բացի Մեղրիի ուղեգծից, հայկական կողմը բարձրացրել է նաև Իջևան–Աղստաֆա երկաթգծի վերագործարկման հարցը։ Սովետական շրջանի այս ուղին մեծամասամբ պահպանվել է, սակայն նախնական գնահատականներով դրա վերանորոգումը կարժենա շուրջ 450 միլիոն դոլար։