Քննարկվում են կոնկրետ քայլեր, որոնք կբերեն առաջընթացի ԼՂ հակամարտության կարգավորման հիմնախնդրում. Լավրով

Ռուսաստանն ու Ադրբեջանը երկկողմ շփումների շրջանակում քննարկում են կոնկրետ քայլեր, որոնք կարող են և պետք է բերեն առաջընթացի Լեռնային Ղարաբաղի հակամարտության կարգավորման հիմնախնդրում: Այս մասին Բաքվում, Ադրբեջանի արտգործնախարար Էլմար Մամեդյարովի հետ հանդիպման ժամանակ հայտարարել է ՌԴ արտաքին գործերի նախարար Սերգեյ Լավրովը:

«Երեկ մանրակրկիտ ու անկեղծ երկխոսություն է եղել Ադրբեջանի նախագահ Իլհամ Ալիևի հետ: Քննարկել ենք երկկողմ հարաբերությունները և նախանշել հետագա քայլերը, որոնք կարող են և պետք է բերեն առաջընթացի ղարաբաղյան հակամարտության հիմնախնդրում»,- ասել է Լավրովը:

Իր հերթին Մամեդյարովը նշել է «երկխոսության բարձր մակարդակը, որը գնալով ավելի է ակտիվանում»: Նախարարի խոսքով, կողմերը երկխոսում են շատ հարցերի շուրջ՝ հումանիտար, տնտեսական, Լեռնային Ղարաբաղի կարգավորման և այլն:

«Հույս կա, որ բանակցային գործընթացի ակտիվացումը կկարողանա քանդել այս ձգձգված հակամարտության կծիկը»,- շեշտել է Ադրբեջանի ԱԳ նախարարը: